Дархан-Уул аймгийн Хараагийн хөндийд байрлах Гидро-Карьерийн үйлдвэрийн кварцын элсний ордыг анх ЗХУ-ын геологи хайгуул, эрдэм шинжилгээний институт, барилга, барилгын материалын үйлдвэрлэлийн эрдэм шинжилгээний институттэй хамтран 1977-1980 оны хооронд кварцын элсний геологи-хайгуул, судалгаа шинжилгээ, туршилтын ажлуудыг хийж шинжлэх ухааны институтээр баталгаажуулж нөөцийг нь тогтоосон билээ. Кварцын элсний орд газрын үйлдвэрлэлийн техник технологийн инженерийн зураг төсвийг Москвагийн зураг төсвийн хүрээлэнд боловсруулж 1981 оноос кварцын элсийг гидрокарьерийн аргаар угааж баяжуулах техник технологийн иж бүрэн үйлдвэрийг барьж 1984 онд ашиглалтанд оруулсан.